AVRONEST Parlament Assambleyası Bakıda keçiriləcək

Image

 

Bu barədə AVRONEST PA-da Azərbaycan nümayəndə heyətinin rəhbəri, QHT sədri Elxan Süleymanov məlumat verib. Onun sözlərinə görə qurumun 2-4 aprel 2012-ci ildə Bakıda keçiriləcək sessiyasına texniki və təşkilati hazırlıq işləri başa çatdırılıb.

Mart ayının 15-də Strasburqda AVRONEST PA-nın Büro iclası keçirilib. İclasda Bakı sessiyasının gündəliyi müzakirə edilərək təsdiq edilib. Gündəlikdə qurumun plenar sessiyası, daimi komitələrin və Belarus üzrə işçi qrupu iclaslarının, eləcə də büro iclasının keçirilməsi haqqında razılıq əldə edilib.

Millət vəkili cari ilin yanvar ayının sonlarında Siyasi məsələlər, Enerji təhlükəsizliyi və İqtisadi inteqrasiya komitələrinin Brüsseldə, Sosial məsələlər Komitəsinin isə fevral ayında İrəvanda iclaslarının keçirildiyini xatırladaraq  bu iclaslarda Komitələrin hazırladıqları məruzə layihələrinin müzakirəyə çıxarıldığını, həmin sənədlərin qurum üzvləri və Şərq Tərəfdaşlığı milli nümayəndə heyətləri tərəfindən əlavə və dəyişikliklər edilməsi üçün açıq elan edildiyini vurğulayıb. Bu sənəd layihələri bütövlükdə qurumun məqsədlərini əks etdirməklə yanaşı, eyni zamanda Azərbaycanın maraqlarına uyğundur. Bakı sessiyası zamanı Komitələr tərəfindən hazırlanmış sənədlər təklif edilmiş əlavə və dəyişikliklərlə birlikdə müzakirə edilərək qətnamə şəklində qəbul ediləcəkdir. Siyasi məsələlər Komitəsində həmməruzəçi millət vəkili Əli Hüseynli,  Enerji təhlükəsizliyi Komitəsində həmməruzəçi millət vəkili Rasim Musabəyov olacaq. 

Azərbaycan tərəfi ikinci sessiyaya ev sahibliyi edəcək tərəf kimi sessiyanın gündəliyi ilə bağlı bir sıra təkliflər irəli sürüb. Bu təkliflər sırasında AVRONEST PA həmprezidentləri cənab Kristian Vigenin və cənab Boris Tarasyukun rəhbərliyi ilə qurumun Büro üzvlərinin Azərbaycan Respublikasının Prezidenti cənab İlham Əliyevlə görüşü və Prezident İlham Əliyevin Plenar sessiyada çıxış etməsi yer almışdı. Bu təkliflər müzakirə edilərək qəbul edildi.
Azərbaycan tərəfi bundan əlavə Komitə iclaslarında müzakirə ediləcək mövzu çərçivəsində ölkəmizin müvafiq nazirliklərinin yüksək səviyyəli məmurlarının çıxış etməsi təklifini verib. Xarici işlər naziri Elmar Məmmədyarovun Siyasi məsələlər Komitəsinin, Sənaye və energetika naziri Natiq Əliyevin Enerji təhlükəsizliyi Komitəsinin, İqtisadi inkişaf nazirinin müavini Sevinc Həsənovanın İqtisadi inteqrasiya Komitəsinin və Mədəniyyət və turizm naziri Əbülfəs Qarayevin isə Sosial məsələlər Komitəsinin iclasında çıxış etmələri haqqında razılıq əldə edilib. 

Dövlət Neft Şirkətinin prezidenti cənab Rövnəq Abdullayevin və ya vitse-prezidenti Elşad Nəsirovun və nativ və Bərpa Olunan Enerji Mənbələri üzrə Dövlət Agentliyinin direktoru cənab Akim Bədəlovun Enerji təhlükəsizliyi komitəsinin, Prezident Administrasiyasının İctimai-siyasi şöbəsinin müdiri cənab Əli Həsənovun və Mərkəzi Seçki Komissiyasının sədri cənab Məzahir Pənahovun Siyasi məsələlər komitəsinin, Təhsil Naziri cənab Misir Mərdanovun, İdman və gənclər naziri Azad Rəhimovun isə Sosial məsələlər komitəsinin iclasına dəvət edilmələri barədə Azərbaycan tərəfinin təklifi müsbət qarşılanaraq qəbul edilib.

Millət vəkili qeyd edib ki, AVRONEST PA iki komponentdən ibarətdir. Bu komponentlərin biri Avropa Parlamentinin 60 nəfər deputatından və digəri isə Şərq Tərəfdaşları ölkələrinin (Azərbaycan, Ukrayna, Gürcüstan, Moldova və Ermənistan) hər birinin milli parlamentlərinin 10 deputatından təşkil edilib. Bakı sessiyasında AVRONEST PA-nın Avropa Parlamenti komponenti və Ukrayna, Gürcüstan, Moldova və Ermənistan nümayəndə heyətləri tam tərkibdə iştirak edəcəklər.   

AVRONEST PA-nın Bakı sessiyası zamanı bir sıra yeniliklər tətbiq ediləcək. Belə ki, ilk dəfə olaraq  qurumun Bakı sessiya zamanı elektron səsvermədən istifadə ediləcək. Bunun üçün səsvermədə iştirak edəcək Avropa Parlamenti üzvləri və Şərq Tərəfdaşlığı ölkələrinin nümayəndə heyətlərinin üzvləri xüsusi kartlarla təmin ediləcəklər. Bununla yanaşı, AVRONEST PA-nın Bakı sessiyasına həsr olunmuş internet saytı fəaliyyət göstərəcək. Artıq internet saytının hazırlanması son mərhələdədir və yaxın günlərdə istifadəçilərin ixtiyarına veriləcəkdir. 

Sonda AVRONEST PA-da Azərbaycan nümayəndə heyətinin rəhbəri plenar sessiyanın keçiriləcəyi ilk Şərq Tərəfdaşlığı ölkəsinin Azərbaycan olmasını  böyük siyasi uğur kimi səciyyələndirərək ölkəmizin mötəbər tədbirin keçirilməsinə tam hazır olduğunu qeyd edib. O, Bakı sessiyasının müvəffəqiyyətlə keçiriləcəyinə və gələcəkdə AVRONEST PA-nın Şərq Tərəfdaşlığı ölkələrində keçiriləcək analoji sessiyalar üçün təcrübə mənbəyi olacağına əmin olduğunu bildirib. 

Mənbə: http://www.qhtxeber.az/news/a-15158.html