Sunday, 11 Apr 2021

Prezident yanında Dövlət İdarəçilik Akademiyası və Vəkillər Kollegiyası arasında memorandum imzalanıb

Martın 18-də Azərbaycan Respublikasının Prezidenti yanında Dövlət İdarəçilik Akademiyası (DİA) ilə Azərbaycan Respublikasının Vəkillər Kollegiyası arasında Anlaşma Memorandumu imzalanıb.

İlk öncə Ulu Öndərin DİA-dakı büstu ziyarət edildi. Daha sonra Heydər Əliyev Dövlət İdarəçilik Məktəbi ilə tanışlıq oldu. Memorandumu DİA-nın rektoru, akademik Urxan Ələkbərov və Vəkillər Kollegiyasının sədri Anar Bağırov imzalayıblar.

Memorandum kadr potensialının gücləndirilməsi məqsədilə yüksəkixtisaslı kadrların hazırlanması, dövlət qulluğu sistemində çalışan gənc kadrların ixtisasının artırılması üzrə ixtisasartırma kurslarının təşkili, hüquq sahəsində təhsil alan gənc kadrların könüllülük proqramlarında iştirakını, onların praktik təcrübə əldə etmələrini dəstəkləmək istiqamətində əməkdaşlıq və digər məsələləri əhatə edir.

İmzalanma mərasimində çıxış edən rektor Urxan Ələkbərov ümummilli lider Heydər Əliyevin müəllifi olduğu inkişaf strategiyasının nailiyyətləri və Ulu Öndərin layiqli davamçısı Prezident İlham Əliyevin ölkədə həyata keçirdiyi davamlı inkişafın uğurlu nəticələri, inklüziv cəmiyyətin formalaşması sahəsində görülən işlərin müsbət nəticələrini qeyd edib. Rektor ölkəmizdə nadir idarəçilik texnologiyalarının tətbiqi, çevik dövlət idarəetmə sisteminin formalaşdırılması, elmə əsaslanan innovativ inkişaf strategiyasının reallaşdırılması, dövlət quruculuğu və dövlət qulluğunun inkişafına diqqət çəkib. U.Ələkbərov vurğulayıb ki, ölkəmizin qısa müddətdə iqtisadi, sosial, siyasi, humanitar və digər sahələrdə qazandığı yüksək nailiyyətlər, XXI əsrin çağırışlarının həllinə yönəlmiş dünya əhəmiyyətli təşəbbüsləri, ildən-ilə artan beynəlxalq nüfuzu Azərbaycanı bir çox istiqamətlərdə regional və qlobal liderə çevirib. Son 44 günlük müharibə və ölkənin zəfəri bunu bir daha nümayiş etdirdi.

Sonra Vəkillər Kollegiyasının sədri Anar Bağırov təqdimatla çıxış edərək bildirib ki, ölkəmizdə idarəçilik sahəsində peşəkar kadrların yetişdirilməsinə xüsusi diqqət ayıran qabaqcıl aparıcı tədris, metodik, elm və analitik informasiya mərkəzi olan DİA ilə birgə əməkdaşlıq önəmli addımlardan biridir.

Anar Bağırov vəkillik institutunun tarixinə ekskurs edərək müqayisəli təhlil aparmış, Azərbaycanda müasir vəkilliyin dünya ölkələrinin vəkillik qurumları ilə müqayisədə əhəmiyyətli müsbət dəyişikliyə məruz qaldığını bildirmiş, bu dəyişikliyin ölkə rəhbəri tərəfindən müəyyən edilmiş hədəflərə uyğun olaraq həyata keçirildiyini vurğulamışdır.

Anlaşma Memorandumu haqında danışan sədr burada əsas məqsəd hüquqşünaslıq ixtisası  üzrə təhsil alan tələbələrin, magistrların, doktorantların Vəkillər Kollegiyasının struktur bölmələrində və Vəkil bürolarında təcrübə keçmələri, DİA-nın Hüquq kafedrasının metodik materiallarına, elmi əsərlərə, Vəkillər Kollegiyası tərəfindən hazırlanmış vəsaitlərə DİA-nın Hüquq kafedrası əməkdaşları tarəfindən rəylərin, tövsiyələrin verilməsi, hüquq tədbiqi fəaliyyətdə daha çox rast gəlinən problemlərin həlli məqsədi ilə birgə elmi-praktiki araşdırmaların aparılması, Vəkillər Kollegiyasının üzvlərinin DİA-da hüquqşünasların hazırlığı prosesində iştirak edilməsi və sair məsələlər nəzərdə tutulmuşdur.

Tədbirin sonunda Azərbaycan Respublikasının Prezidenti yanında Dövlət İdarəçilik Akademiyası ilə Azərbaycan Respublikasının Vəkillər Kollegiyası arasında Anlaşma Memorandumu imzalandı. DİA-nın kitabxanasına hüquq sahəsi ilə bağlı bir sıra kitablar hədiyə edildi.

Mənbə: https://barassociation.az/news/668